Osy kezge deıin 4 qoıma jumys istep kelgenimen, tozyǵy jetken jáne kókónis saqtaýdyń talaptaryna saı emes. Memleket qoldaýynyń arqasynda Dmıtrıı Sharapaev jetekshilik etetin «Radýga» JShS-i syıymdylyǵy eki myń tonnalyq jańa kókónis saqtaý qoımasyn turǵyzdy. Bul óńirdegi kókónisterdi bólip saqtaýǵa arnalǵan alǵashqy zamanaýı qoıma bolyp tabylady. Ol sońǵy úlgidegi jeldetý jáne sýytý júıelerimen tolyq qamtamasyz etilgen. Chehııalyq tońazytqyshtar túgelimen avtomattandyrylǵan. Osynyń arqasynda kókónis ónimderin, onyń ishinde turaqtandyrý qorynyń ónimin sapaly ári uzaq saqtaı alady. Búginde 800 tonna kartop, pııaz, sábiz, qyryqqabat jetkizilgen.
Zamanaýı qoımanyń múmkindikterimen tanysqan aımaq basshysy Qumar Aqsaqalov júzege asyrylǵan jobanyń strategııalyq mańyzyn atap ótti. Saýda núktelerine kókónis úzbeı jetkizilip, qysqy jáne kóktemgi mezgilderde kókónis baǵasynyń negizsiz ósýine, deldardardyń aralasýyna jol berilmeıdi.
«Eski qoımalardyń múmkindigi shekteýli bolǵandyqtan, kókónis naýryz aıyna deıin ǵana saqtalatyn. Qor taýsylǵannan keıin baǵanyń ósýi baıqalatyn. Endi kókónis ónimderin shilde aıyna deıin saqtaı alamyz. Baǵany turaqtandyrýdyń ózge de joldary qarastyrylatyn bolady», deıdi Q. Aqsaqalov.
Bıyl jarty mıllıon tonnaǵa jýyq kartop jınaldy. 110 myń tonna kókónis alyndy. Kelesi jyly kókónis alqaptary taǵy da ulǵaıtylmaq.
О́mir ESQALI,
«Egemen Qazaqstan»
Soltústik Qazaqstan oblysy
